醫管局周三（19日）更新了「在不同環境個人防護裝備建議」（Recommended PPE in different settings），將保護衣的標準降低：進入有懷疑／確診病例的隔離病房時，醫護人員本來應穿著AAMI Level 3的保護衣，更新標準後降至AAMI Level 1。醫管局回覆眾新聞查詢時表示降格是根據世界衛生組織（世衛）早前更新的建議。


正在屯門醫院「Dirty Team」工作的內科醫生黃任匡解釋，分別在於Level 3的防水、Level 1的不能防水，如果只是日常護理工作，風險差異不大，「但如果你埋身（工作）呢，譬如你如果預計病人會咳，或者你做某些嘢，有機會有水或者飛沫濺出嚟嘅話呢，AAMI level 1就未必能夠阻隔到啲病毒。」他又認為此時將防護裝備降格相當打擊士氣，而且令到同事更加擔心、緊張。


他續指：「當然另一方面我亦都明白，存貨肯定係不足啦，雖然佢死口唔認......咁而家梗係你用到無喇，就嚟用晒存貨，你先會突然間嗌人唔好用嗰啲咁高規格嘅嘢啦。但係就，如果要咁樣做嘅話，我覺得要解釋得清楚俾同事聽，等啲同事明白先咁樣行，會好少少囉。」


翻查世衛文件，最新一份防疫裝備指引的更新日期是2月7日，列出了四款有效防疫的保護衣，包括「AAMI PB70 all levels acceptable, or equivalent」，即AAMI 所有級別的保護衣都可以接受。而前一個版本的防疫裝備指引更新於1月27日，列出兩個選項，分別要求使用AAMI PB70 Level 3 或 Level 4 的保護衣，以達到阻隔液體或血源性病原體（blood borne pathogens）。換言之，世衛的標準在2月7日已經降低。


而醫管局在2月19日更新裝備建議時，才決定降格。作為醫護前線的黃任匡表示，事前沒有醫管局代表與他們溝通，但認為影響不算非常大，「但係就，如果要咁樣做嘅話，我覺得要解釋得清楚俾同事聽，等啲同事明白先咁樣行，會好少少。」


他認為最受影響的是護士、物理治療師／專職醫療人員以及病房助理，病房助理有時要幫病人換衫，「埋身」工作風險較大。他續指，「嗰張圖下面都有個頭盔嘅：如果你覺得會有splashing（液體飛濺）嘅話，你就著件膠嘅圍裙喺黃色嗰件AMMI 1 上面，都可以考慮嘅，唔一定用AMMI 3。」也就是將責任放在醫護前線個人身上。


黃任匡又解釋裝備降格不會構成非常大的風險，早前法國醫院及屯門醫院分別有病人在確診前留院普通病房、骨科病房，「so far喺普通病房或骨科病房接觸過確診病人嘅醫護人員，或者手術室嘅醫護人員，大吉利是都無事。咁佢哋都無著PPE（個人防護裝備）嘅，就咁戴個surgical mask（外科口罩），但係呢啲人好彩都無做過高風險程序，譬如頭先講嘅抽痰，或者做急救，所以都無人受到影響。」


但黃任匡續稱：「呢一刻來講，你對同事嘅心理影響好大。因為大家而家仲係好驚、好panic（恐慌），喺醫院裡面、行內大家都仲係處於好驚嘅狀態。譬如好似前日確診咗嘅一個婆婆，斷骨啱啱做完手術，嘩大家即刻恐慌。過去兩、三日已經有差唔多20個照顧過佢嘅姑娘或者醫護人員，已經陸續入院，有啲又發燒，好彩so far都無人中招，但喺呢啲咁嘅關口，你突然提出話（防護裝備）要降格嘅話呢，大家就會係...更加擔憂同埋不滿，而呢樣嘢係重要嘅我覺得。


「我覺得管理層處理呢啲嘢除咗要理性分析之外，你都一定要處理同事嘅情感。同事喺裡面已經好辛苦，精神壓力亦都好大，咁你做呢啲嘢一定係好打擊士氣。」


黃任匡又表示明白醫院有存貨不足的問題，「雖然佢死口唔認，唔認呢個降格係唔關存貨唔足事，但係傻嘅都知，你無啦啦做咩而家要降格啫，舊年你唔走去降格，而家嚟降格。咁而家梗係你用到無喇，你先會突然間嗌人唔好用嗰啲咁高規格嘅嘢。」


黃任匡在「dirty team」工作了差不多三個禮拜，還有幾日就會結束這期在隔離病房照顧確診／疑似武漢肺炎病人的工作。現行安排下，他沒有washout period（清洗期），即離開dirty team後即時回到一般內科病房工作，顯然會構成傳播風險。黃任匡唯有自製washout period，「我自己就選擇將dirty team工作嗰三個幾禮拜，我就完全唔放假，將嗰啲假擺晒喺尾，再加多幾日non-clinical duty（改做文書工作），咁樣就變成類似一個禮拜washout period。」


他指，屯門醫院內科每日收70至80個病人，當中有50至60個要入隔離病房，由dirty team照料。他亦都坦言壓力大，有點不勝重荷的感覺，「而我哋成隊dirty team 講緊醫生有十幾人，但已經係好重嘅workload，得十幾個人每日處理50、60個病人，係好辛苦嘅事，再加埋精神壓力都大嘅，即係你會驚自己瀨野（感染武漢肺炎）。」


「對於我哋呢啲一把年紀嘅人來講，會好辛苦，因為你幾廿歲人成晚唔瞓覺，不停喺度收症。太陽出喇，都仲係做緊，係好辛苦。但如果你計（工作）時數，同平時唔係差好遠。」黃任匡言談間亦顯疲態，隔著電話都聽到他想打呵欠時扯高喉嚨的聲音。


他想念家人，當然想念家人，「平時放咗工返屋企，你可以有得休息，同屋企人有啲family time，有工作以外嘅生活。而家就斷六親，屋企人又唔見得，朋友又唔見得，同事亦唔建議太多（社交活動），話盡量唔好一齊食飯，自己喺一角食就算喇。都幾咩嘅，人係群體動物來嘅，成個月完全好似獨居老人咁，其實都係有啲辛苦嘅。」


醫管局回覆眾新聞查詢的全文：

「醫院管理局設有嚴謹的感染控制指引及培訓， 讓不同工作崗位的前線醫護人員，了解及熟悉於相關工作環境下， 進行不同醫療程序時需要採取的感染控制措施， 包括穿著合適的個人保護裝備。醫護人員會根據病人的傳染病類別， 包括飛沫、空氣或接觸傳播，按指引穿著相應的保護裝備。


醫管局參考世界衞生組織早前更新的建議， 醫護人員於處理懷疑或確診感染2019冠狀病毒病的病人時， 可以穿著黃色保護衣(AMMI level 1 isolation gown)。如預計會出現飛濺情況，可以考慮穿著藍色保護衣( AMMI level 3 isolation gown)或穿著黃色保護衣(AMMI level 1 isolation gown)外加上防水圍裙。


自2019冠狀病毒病疫情開始， 醫管局及公立醫院陸續收到社會各界的物資捐贈， 醫管局感謝社會熱心人士對前線醫護的支持。 醫管局有專門部門處理熱心人士提出的捐贈，獲贈物資中， 不乏口罩等防護裝備，會盡快發放予同事使用。」